અવશ્ય પાળવા યોગ્ય નિયમો
પરિણતિ પર્વ ઉપધાન 2027
- 1.ઉપધાનતપ જીવનમાં એક જ વાર કરી શકાતી મહત્ત્વપૂર્ણ ક્રિયા છે. આ ક્રિયા જો યોગ્ય રીતે કરવામાં આવે તો, આત્માની દશા અને પ્રગતિની દિશા બંને બદલી શકાય તેમ છે. તેથી સંપૂર્ણ આત્મશુદ્ધિ સાથે ક્રિયા કરવા માટે પધારવું.
- 2.આ ક્રિયા સંયમજીવનનો રસાસ્વાદ માણવા માટે છે. જો આ ક્રિયાને વ્યવસ્થિત રૂપમાં આરાધવામાં આવે તો શ્રાવકજીવનમાં રહીને પણ જાણે સર્વવિરતિની નિર્મળતા અને પ્રસન્નતાનો આંશિક અનુભવ કરી શકાય છે. તેથી समणो इव सावओ हवइ जम्हा એ શાસ્ત્રપંક્તિને ઘૂંટવાના લક્ષ્ય સાથે પધારવું.
- 3.ઉપધાન તપમાં પધારવા માટે સંમતિપત્ર અનિવાર્ય રહેશે.
- 4.ઉપધાન તપ શરૂ થવાના લગભગ 15 દિવસ પૂર્વે આપને એક સૂચનાપત્ર મોકલવામાં આવશે. જેમાં એ 15 દિવસ માટે ડાયેટ પ્લાન, માનસિક શુદ્ધિ માટે કરવાની જાપ વગેરે ક્રિયા, શારીરિક કેળવણી માટે કરવા યોગ્ય વર્કઆઉટ વગેરે આપવામાં આવ્યા હશે. ઉપધાન તપની વાસ્તવિક પ્રસન્નતા માણી શકાય એ માટે એ સૂચનાપત્રને ચોકસાઈથી અનુસરવું.
- 5.વિધિપૂર્વક ઉપધાન કરવાનાં છે. તેથી મોબાઇલ વગેરે સાધનોનો સીધો કે પરંપરાએ પણ ઉપયોગ કરાવી શકાશે નહીં. અતિ આવશ્યક પ્રયોજન હોય તો પૂજ્ય ગુરુભગવંતની રજા લઈને સ્વયંસેવક ભાઈ-બહેનોને સૂચના આપી શકાશે. તેઓ યોગ્ય વ્યક્તિને તમારો સંદેશો પહોંચાડી દેશે.
- 6.ઉપધાનમાં વસ્ત્રશુદ્ધિ, પાત્રશુદ્ધિ, ઉપકરણશુદ્ધિ વગેરે આવશ્યક છે.
- 7.ચરવળો, મુહપત્તિ, કામળી, આસન વગેરે દરેક ઉપકરણોનો સામાચારી પ્રમાણે ઉચિત ઉપયોગ કરવાનો રહેશે. એમાં થતી ભૂલના પ્રાયશ્ચિત્તરૂપમાં પૂજ્ય ગુરુભગવંત ઉપધાનમાંથી બહાર થવા સુધીની આજ્ઞા ફરમાવી શકશે.
- 8.વાચના, ધ્યાનસાધના, પ્રભુભક્તિ, વિવિધ અનુષ્ઠાનો, ક્રિયા, જાપ વગેરેમાં ઉત્સાહપૂર્વક સ્વયં જોડાવાનું રહેશે.
- 9.ઉપધાન તપ આત્માભિમુખતા કેળવવા માટે હોય છે. તેથી આ દિવસોમાં બને તેટલું મૌન રાખવું આપના માટે હિતાવહ રહેશે. સ્વજનો-પ્રિયજનો સાથેનો સંપર્ક બને તેટલો ઓછો રહે એ ઇચ્છનીય છે. શાતા પૂછવા આવનાર વ્યક્તિને આરાધનામાં જોડવાનું લક્ષ્ય રાખવું. એ આપણી પાસેથી સંયમજીવનની મીઠાશ લઈને જાય એવું થવું જોઈએ. એ એમનો સંસાર આપણી પાસે મૂકીને જાય એ ન ચાલે.
- 10.આયોજક પરિવાર ખૂબ ઊંચી ભાવના ધરાવે છે. તેથી આપની નીવિ-આયંબિલ વગેરે ભક્તિ ખૂબ ઉત્તમ દ્રવ્યોથી થશે. પણ આપનું લક્ષ્ય બને તેટલી નિરીહતા અને સંયમ કેળવવાનું હોવું જોઈએ.
- 11.આપનું આરોગ્ય, શારીરિક સ્થિતિ, જરૂરિયાતો વગેરે સમજીને આપને બધી જ ઉચિત સગવડ આપવામાં આવશે. પરંતુ આપ કોઈ પણ વાત માટે સ્વયંસેવક ભાઈ-બહેનો કે કર્મચારી વર્ગ સાથે ક્લેશ ન કરશો. આપની તમામ ફરિયાદોનો યથાશક્ય ઝડપી નિકાલ કરવામાં આવશે. પરંતુ આપની પાસે પણ ધીરજની અને સમજણની અપેક્ષા રહેશે.
મંડન પરિવારના સબહુમાન પ્રણામ અવધારશો.